ಶಿವಗಂಗೆ ಕೋತಿ ಉಳಿಸಲು ಟೆಕ್ಕಿಗಳ ಅಭಿಯಾನ

ಶಿವಗಂಗೆ ಬೆಂಗಳೂರು ಗ್ರಾಮಾಂತರ ಜಿಲ್ಲೆಯ ನೆಲಮಂಗಲ ತಾಲ್ಲೂಕಿನ ಗಿರಿಕ್ಷೇತ್ರ. ಬೆಂಗಳೂರು-ತುಮಕೂರು ರಾಷ್ಟ್ರೀಯ ಹೆದ್ದಾರಿ-4ರಲ್ಲಿರುವ ಡಾಬಸ್ ಪೇಟೆಯಿಂದ ದಕ್ಷಿಣಕ್ಕೆ ಹತ್ತು ಕಿ.ಮೀ ಸಾಗಿದರೆ ತಲುಪಬಹುದು. ಬೆಂಗಳೂರಿನಿಂದ ಒಟ್ಟು 50 ಕಿ.ಮೀ. ದೂರದಲ್ಲಿದೆ. ಹೆಸರೇ ಸೂಚಿಸುವಂತೆ ಒಳಕಲ್ ತೀರ್ಥದಲ್ಲಿ ಗಂಗೆಯನ್ನು ಸ್ಪರ್ಶಿಸಲು ನಿತ್ಯ ಸಾವಿರಾರು ಭಕ್ತರ ಸಮಾಗಮ. ಹೊನ್ನದೇವಿಯ ಆವಾಸಸ್ಥಾನ. ದಕ್ಷಿಣ ಕಾಶಿ ಎಂದೇ ಪ್ರಸಿದ್ದಿ.

ಬೆಟ್ಟದ ತಪ್ಪಲಲ್ಲಿರುವ ಪುಟ್ಟಗ್ರಾಮ ಶಿವಗಂಗೆ. ಬೆಟ್ಟದ ತುದಿ ತಲುಪಲು 1500 ಅಡಿ ಮೆಟ್ಟಿಲೇರಬೇಕು. ಗವಿ, ಕಲ್ಯಾಣಿ, ಕಾಡು ಮೇಡುಗಳಿಂದ ಆವೃತ ಕಡಿದಾದ ಬೆಟ್ಟ. ಈಚೆಗೆ ಖಡ್ಗ ಸಂಘದ ಟೆಕ್ಕಿಗಳು ಪವಿತ್ರ ಸ್ಥಳ ಭೇಟಿಗೆ ತೆರಳಿದ್ದರು. ಅವರ ಗಮನ ಸೆಳೆದಿದ್ದು ಅಲ್ಲಿದ್ದ ನೂರಾರು ಕೋತಿಗಳು. ಅವುಗಳ ಸ್ಥಿತಿ-ಗತಿ ಬಗ್ಗೆ ಗಮನ ಅವಲೋಕನ. ಅವುಗಳ ರಕ್ಷಣೆಗಾಗಿ ಯೋಜನೆ ರೂಪಿಸುವ ಸಂಕಲ್ಪ ಅವರಲ್ಲಿ ಮೊಳಕೆಯೊಡೆಯಿತು.

ಬೋಳು ಬೆಟ್ಟದ ತುದಿಯಲ್ಲಿ ಕೋತಿಗಳಿಗೆ ನಿತ್ಯ ಬೇಟಿ ನೀಡುವ ಪ್ರವಾಸಿಗರ ಕೈಯನ್ನೆ ಎದುರು ನೋಡುತ್ತಿರುತ್ತವೆ. ಭಯದಿಂದ ಹತ್ತಿರ ಬಾರದೆ. ಏನಾದರೂ ಎಸೆದರಷ್ಟೆ ಹೊಟ್ಟೆ ಪಾಡು. ಇಲ್ಲವಾದರೆ ಹಸಿವೆಯಿಂದ ಬಡಕಲಾದ ದೇಹದಲ್ಲಿ ಬಳುಕುವ ದಂಡು ಎಲ್ಲೆಲ್ಲೂ ಕಾಣ ಸಿಗುತ್ತವೆ. ಪ್ರವಾಸಿಗರಿಂದ ಹಸಿದ ಹೊಟ್ಟೆಗೆ ಅರೆಕಾಸಿನ ಮಜ್ಜಿಗೆ ಎನ್ನುವಷ್ಟು ಸಿಕ್ಕರೆ ಪುಣ್ಯ. ವನ್ಯಾಧಾರಿತ ಆಹಾರದ ಗಣಿಯೂ ಅಲ್ಲಿಲ್ಲ. ಹಾಗಾಗಿ ಸೊಪ್ಪು, ಸೆದೆಯಲ್ಲಿಯೇ ಹೊಟ್ಟೆ ತುಂಬಿಸಿಕೊಂಡ ಬದುಕುವ ಹೊಣೆ.

ಈ ಚಿತ್ರಣ ಟೆಕ್ಕಿಗಳ ಮನ ತಲ್ಲಣಗೊಳಿಸಿತು. ಅಲ್ಲಿಯೇ ಕೋತಿಗಳಿಗೆ ನಿತ್ಯ ಆಹಾರ ಒದಗಿಸಲು ಯೋಜನೆ ರೂಪಿಸಲು ದೃಢ ನಿರ್ಧಾರ ಮಾಡಿದರು. ಬೆಂಗಳೂರಿಗೆ ಹಿಂತಿರುಗಿ ‘SAVE MONKEYS SHIVAGANGE’ ಎಂಬ ವ್ಯಾಟ್ಸಪ್ ಗ್ರೂಪ್ ತಯಾರಿಸಿದರು. ಸದಸ್ಯರಿಗೆ ಲಿಂಕ್ ಮೂಲಕ ಸದಸ್ಯತ್ವಕ್ಕೆ ಆಹ್ವಾನಿಸಿದರು. ಈಗಾಗಲೇ ಸಾಕಷ್ಟು ಸದಸ್ಯರು ಗ್ರೂಪ್ ಸೇರಿದ್ದಾರೆ. ಉದ್ದೇಶ ಇಷ್ಟೆ ತಿಂಗಳಲ್ಲಿ ಒಂದು ದಿನ ಶಿವಗಂಗೆ ಬೆಟ್ಟದ ಕೋತಿಗಳಿಗೆ ಆಹಾರಕ್ಕಾಗಿ ಧನಸಹಾಯ ಮಾಡಲು ಘೋಷಿಸುವುದು. ಖಡ್ಗ ಸಂಘದ ರಘು ಪ್ರತಿ ತಿಂಗಳ 1 ನೇ ದಿನ ಕೋತಿಗಳ ಆಹಾರಕ್ಕಾಗಿ ಹಣ ಒದಗಿಸಲು ಘೋಷಣೆ ಮಾಡಿದ್ದಾರೆ. ನಿತಿನ್ ದೇವರಾಜ್ 2ನೇ ದಿನ, ಸಂತೋಷ ಕುಮಾರ್ ಶಿಕ್ಷಕ 3ನೇ ದಿನ… ಹೀಗೆ ಅನೇಕರು ಕೋತಿಗಳಿಗೆ ಆಹಾರ ನೀಡಲು ಧನ ಸಹಾಯಕ್ಕೆ ನೊಂದಾಯಿಸಿಕೊಂಡಿದ್ದಾರೆ. ತಿಂಗಳ ಅಂತ್ಯದವರೆಗೆ ಆಹಾರ ಒದಗಿಸಲು ನೊಂದಾಯಿಸಲಾಗುತ್ತಿದೆ.

ಸದ್ಯ ರೂ.100 ನ್ನು ಕೋತಿಗಳ ಆಹಾರಕ್ಕೆ ಕೊಡಲು ನಿಗದಿಗೊಳಿಸಲಾಗಿದೆ. ಸದಸ್ಯರ ಸಂಖ್ಯೆ ಹೆಚ್ಚಾದಲ್ಲಿ ಹೆಚ್ಚು ಆಹಾರ ಒದಗಿಸಲು ಸಾಧ್ಯವಾಗಲಿದೆ. ಅಲ್ಲಿನ ಅರ್ಚಕರೊಬ್ಬರಿಗೆ ಖಾತೆಗೆ ಪ್ರತಿ ದಿನ ಹಣವನ್ನು ಪೇಟಿಎಂ ಮೂಲಕ ಹಾಕಲಾಗುವುದು. ಅವರು ಆ ಹಣದಿಂದ ಕೋತಿಗಳಿಗೆ ನಿತ್ಯ ಆಹಾರ ನೀಡಲು ಒಪ್ಪಿದ್ದಾರೆ. ಭಕ್ತರು ಕೋತಿಗಳಿಗೆ ಒಂದಿಷ್ಟು ಆಹಾರ ನೀಡಿದರೆ. ಮೂಕ ಪ್ರಾಣಿಗಳ ಹೊಟ್ಟೆ ತುಂಬಲು ಸಹಾಯವಾಗಲಿದೆ ಎಂಬುದು ಟೆಕ್ಕಿಗಳ ಮನವಿ.

ಮುಂದಿನ ದಿನಗಳಲ್ಲಿ ಹೆಚ್ಚು ಸದಸ್ಯರಾದಲ್ಲಿ ಹೆಚ್ಚಿನ ಆಹಾರ ನೀಡಲು ಗುರಿ ಹೊಂದಲಾಗಿದೆ. ಈಗಾಗಲೇ ಖಡ್ಗ ಸಂಘ ಚನ್ನಗಿರಿ ತಾಲ್ಲೂಕಿನ ಏಷ್ಯಾ ಖಂಡದ ಎರಡನೇ ದೊಡ್ಡ ಕೆರೆ ಉಳಿಸಲು ಸಾಕಷ್ಟು ಹೋರಾಟ ನಡೆಸಿದೆ. ಸಾಮಾಜಿಕ ಕಳಕಳಿಯುಳ್ಳ ಸಂಘದ ಸದಸ್ಯರಿಗೆ ಸಾಧ್ಯವಾದಷ್ಟು ಸಾಥ್ ನೀಡಿದಲ್ಲಿ ಸಮಾಜದ ಋಣ ತೀರಿಸಲು ಸಣ್ಣ ಕೋಡುಗೆ ನೀಡಿದಂತಾಗುವುದು.

ಹೆಚ್ಚಿನ ಮಾಹಿತಿಗೆ ಸಂಪರ್ಕಿಸಿ ರಘು ಖಡ್ಗ ಸಂಘ: ಮೊಬೈಲ್ ನಂ: 9972414251