ಮನಸ್ಸಿಗೆಟುಕುವ ತಿಂಡಿ ಉಪ್ಪಿಟ್ಟು… ಉಪ್ಪಿಟ್ಟು..

ಬೆಳ್ಳಂ ಬೆಳಿಗ್ಗೆ ಮನೆಯ ಕಿರಾಣಿ ಅಂಗಡಿಯ ಬಳಿ ಮಕ್ಕಳೋ,ನೈಟಿಯಲ್ಲಿರುವ ಮಹಿಳೆಯರೋ, ಬ್ಯಾಚುಲರ್ ಹುಡುಗನೊ ಅರ್ಧ ಕೇಜಿ ರವೆ ಒಂದು ಸ್ವಲ್ಪ ಹಸಿಮೆಣಸಿನಕಾಯಿ ಜೊತೆಗೆ ಕೊತ್ತಂಬರಿ ಸೊಪ್ಪು ತಗೊಂಡು ಹೋಗ್ತಿದಾನೆ ಅಂದ್ರೆ ಅವರ ಮನೆಯ ತಿಂಡಿ ಉಪ್ಪಿಟ್ಟು ಅಂತಲೇ .

ಮನೆಯಲ್ಲಿ ಯಾವುದೇ ಪ್ಲ್ಯಾನು ,ಪೂರ್ವ ತಯಾರಿ ಇಲ್ಲದೇ ಸಿದ್ಧವಾಗುವ ತಿಂಡಿ ಅಂದರೆ ಅದು ಉಪ್ಪಿಟ್ಟು ಮಾತ್ರ , ಇದನ್ನ ದಿಢೀರ್ ತಿಂಡಿ ಅಂತಲೂ ಕರೆಯಬಹುದು .

ಉಪ್ಪಿಟ್ಟು ಅಂದ ತಕ್ಷಣ ಮೂರು ವರ್ಗದ ಜನ ಕಣ್ಮುಂದೆ ಬರುತ್ತಾರೆ ತುಂಬಾನೇ ಇಷ್ಟ ಪಟ್ಟು ನನ್ನ ಫೇವರಿಟ್ ಅನ್ನೋವ್ರು . ಅದು ತಿಂಡೀನೇ ಅಲ್ಲ ಕಾಂಕ್ರೀಟ್ ಅಂತ ಅಲ್ಲಗೆಳೆಯೋವ್ರು . ಮೂರನೇ ವರ್ಗವೊಂದಿದೆ ಅವರು ತಿನ್ನುತ್ತಾರೆ ಆದರೆ ನಿಬಂಧನೆಗಳನ್ನು ಅಳವಡಿಸಿಕೊಂಡು. ಅವೇನೆಂದರೆ ಅವರಿಗೆ ಇಂತಾದ್ದೇ ರವೆಯದ್ದಾಗಿರಬೇಕು , ತರಕಾರಿ ಹಾಕಿರಬೇಕು , ಅವರೇಕಾಯಿ ಬಳಸಿರಬೇಕು, ಬಿಸಿ ಇರಬೇಕು ….ಹೀಗೆ .

ಉಪ್ಪಿಟ್ಟು ನಿಜಕ್ಕೂ ತುಂಬಾ ಉಪಕಾರಿ ಉಪಹಾರ. ಅಮ್ಮಂದಿರಿಗೆ ಪರಮಾಪ್ತ ಕಾರಣವೇನೆಂದರೆ ಕಡಿಮೆ ಪದಾರ್ಥಗಳನ್ನು ಉಪಯೋಗಿಸಿ ಬಹುಬೇಗ ತಯಾರಿಸಬಹುದು .ಒಂದು ಪದಾರ್ಥ ಇಲ್ಲ ಅಂದ್ರೂ ಅಂತಾ ವ್ಯತ್ಯಾಸ ಕಾಣಿಸಲ್ಲ . ಮಧುಮೇಹಿಗಳ ಪಾಲಿಗಂತೂ ರವೆಯ ಸಂಜೀವಿನಿ .

ಸಮಾಜದಲ್ಲಿ ಸ್ಥಿತಿವಂತರಿಂದ ಹಿಡಿದು ಸಾಮಾನ್ಯರವರೆಗೂ ಆಹಾರವಾಗಿ ಬಳಸುವ ಸರಳ ತಿಂಡಿ .ಉಪ್ಪಿಟ್ಟು ಒಂದೇ ಸ್ವಾದ ಅನ್ನಿಸಿದರೂ ಮುಂಜಾನೆ ಒಂದು ತರಹದ ರುಚಿ ಸಂಜೆಯೇ ಮತ್ತೊಂದು ತರಹದ ರುಚಿ ಅನ್ನಿಸುತ್ತದೆ .

ಉಪ್ಪಿಟ್ಟಿಗೇ ಅಂತಲೇ ಒಂದು ಸಮಯ ಮೀಸಲಿದೆ. ಮಾಡಲಿಕ್ಕೂ ಮತ್ತೆ ತಿನ್ನಕ್ಕೂ . ಇದು ಮಧ್ಯಮ ವರ್ಗದ ಮಿತ್ರ ಹಾಗೆಯೇ ಮಧ್ಯಾಹ್ನದ ಶತ್ರು ಕೂಡ .

ತಮಾಷೆಗೆ ಉಪ್ಪಿಟ್ಟನ್ನು ಸಮಯಸ್ಪೂರ್ತಿ ತಿಂಡಿ ಅಂತ ಕರೆಯಬಹುದು ಕಾರಣ ಇದನ್ನು ಬೇಗ ಮಾಡಬಹುದು ಬೇಗ ತಿನ್ನಬಹುದು ಮತ್ತೆ ಜೀರ್ಣ ಸಹ ಬೇಗ ಆಗುತ್ತೆ .

ಉಪ್ಪಿಟ್ಟಿಗೆ ವರುಷಗಳ ಇತಿಹಾಸವಿದೆ . ಇವತ್ತಿಗೂ ಹಲವು ಕಾರ್ಯಕ್ರಮಗಳ ಪ್ರಮುಖ ಉಪಹಾರ ಇದೇ . ಹೆಣ್ಣು ನೋಡುವ ಶಾಸ್ತ್ರದಲ್ಲಂತೂ ಉಪ್ಪಿಟ್ಟಿನದ್ದೇ ಮಧ್ಯಸ್ಥಿಕೆ. ಹೋಟೆಲ್ಗಳ ಪರ್ಮನೆಂಟ್ ಮೆನು ಈ ಖಾರಾಬಾತ್ ಮತ್ತು ಕೇಸರಿಬಾತ್ ನ ಚೌಚೌಬಾತ್ ಜೋಡಿ .‌

ಉಪ್ಪಿಟ್ಟನ್ನು ತುಂಬಾ ಜನ ತುಂಬಾ ವೆರೈಟಿ ಕಾಂಬಿನೇಷನ್ ನಲ್ಲಿ ತಿನ್ನುತ್ತಾರೆ ತಮ್ಮಿಷ್ಟದ ಚಟ್ನಿ ಜೊತೆ , ಉದ್ದಿನ ವಡೆಯೊಂದಿಗೆ , ಉಪ್ಪಿನಕಾಯಿ ಜೊತೆ , ಕಾಫಿ ಟೀ ಜೊತೆ , ಚೌಚೌವಿನ ಜೊತೆ , ತುಪ್ಪದ ಜೊತೆ ಹೀಗೆ . ವಿಶೇಷ ಏನು ಅಂದ್ರೆ ಪ್ರತೀ ಕಾಂಬಿನೇಷನ್ನೂ ಸಹ ಅದ್ಭುತ ರುಚಿಯನ್ನೇ ನೀಡುತ್ತದೆ .

ಪ್ರತೀ ಮನೆಗಳಲ್ಲೂ ಉಪ್ಪಿಟ್ಟನ್ನ ಪ್ರೀತ್ಸೋವ್ರ ಜೊತೆ ವಿರೋಧಿಸುವರೂ ಇರುತ್ತಾರೆ . ಇಂದಿಗೂ ಹಲವು ಮನೆಗಳಲ್ಲಿ ಉಪ್ಪಿಟ್ಟು ಮಾಡಿದ್ರೆ ಜಗಳವಾಗುತ್ತದೆ . ಆದರೆ ಉಪ್ಪಿಟ್ಟು ಮಾಡಲಿಲ್ಲ ಅಂತ ಜಗಳವಾಗುವುದು ವಿರಳ.ಕಾರಣ ಇದನ್ನು ಇಷ್ಟಪಡುವವರು ಹುಡುಕಿಕೊಂಡು ಹೋಗಿ ಹಣ ಕೊಟ್ಟು ತಿನ್ನುತ್ತಾರೆ .

ಉಪ್ಪಿಟ್ಟು ಎಲ್ಲಾ ಸ್ಥಳಗಳಲ್ಲಿಯೂ ಕೈಗೆಟುಕುವ ದರದಲ್ಲಿ ಸಿಗುವ ಮನಸ್ಸಿಗೆಟುಕುವ ತಿಂಡಿ .

ಈ ಅಂಕಣದೊಂದಿಗೆ ಪ್ರಕಟವಾಗಿರುವ ಕಲಾಕೃತಿ ಕಿರಣ ಆರ್ ಅವರದ್ದು. ಲೇಖನದ ಆಶಯವನ್ನು ಅಷ್ಟೇ ಸಮರ್ಥವಾಗಿ ಚಿತ್ರದಲ್ಲಿ ಮೂಡಿಸುವ ಕಲೆ ಅವರಿಗೆ ಸಿದ್ಧಿಸಿದೆ. ಕರ್ನಾಟಕ ಚಿತ್ರ ಕಲಾ ಪರಿಷತ್ತಿನ ಕಾಲೇಜ್ ಆಫ಼್ ಫ಼ೈನ್ ಆರ್ಟ್ಸ್ ನಲ್ಲಿ ಮಾಸ್ಟರ್ ಆಫ಼್ ಫ಼ೈನ್ ಆರ್ಟ್ಸ್ ಪದವೀಧರೆ. ವಾಟರ್,ಆಕ್ರಲಿಕ್,ಆಯಿಲ್ ಪೇಟಿಂಗ್ ನಲ್ಲಿ ಹಲವಾರು ಗುಂಪು ಚಿತ್ರ ಪ್ರದರ್ಶನಗಳಲ್ಲಿ ಇವರ ಚಿತ್ರಗಳು ಪ್ರದರ್ಶನ ಗೊಂಡಿವೆ. ಕಿರಣ ಅವರ ಸಂಗ್ರಹದಲ್ಲಿರುವ ವಿಶಿಷ್ಟ ಕಲಾಕೃತಿಗಳಿಗಾಗಿ [email protected] ಮೂಲಕ ಸಂಪರ್ಕಿಸಬಹುದು.