ಪಠ್ಯಪುಸ್ತಕ ಸ್ವಯಂ ಅಧ್ಯಯನದಿಂದ ಜ್ಞಾನಾರ್ಜನೆ

ಕೊರೊನಾ 1 ಹಾಗೂ 2 ಅಲೆಯ ಭೀಭತ್ಸತೆ ಶಿಕ್ಷಣ ವ್ಯವಸ್ಥೆಯನ್ನು ಅತಂತ್ರಗೊಳಿಸಿದೆ. ಶೈಕ್ಷಣಿಕ ವರ್ಷದ ಕಾರ್ಯಯೋಜನೆಗಳಿಗೆ ಹಿಂದೆಂದೂ ಕಾಣದ ಹಿನ್ನಡೆ ಉಂಟಾಗಿದೆ. ಶಿಕ್ಷಣಕ್ಕಿಂತ ಜೀವ ಅಮೂಲ್ಯ. ಜೀವ ಇದ್ದರೆ ಜೀವನ. ಇಂತಹ ಸಂದಿಗ್ಧತೆಯಲ್ಲಿ 2020-21 ಸಾಲಿನ ಎಲ್ಲಾ ಹಂತದ ಶಿಕ್ಷಣ ವ್ಯವಸ್ಥೆ ಅನಿಶ್ಚಿತತೆಯಲ್ಲಿದೆ. ಯಾರನ್ನೂ ಹೊಣೆಯಾಗಿಸದ ಸ್ಥಿತಿಯಲ್ಲಿ ಮಕ್ಕಳಿಗೆ ಸ್ವ ಅಧ್ಯಯನದ ಆಸಕ್ತಿ ಚಿಗುರೊಡೆಯುವಂತೆ ಪೋಷಿಸುವುದು ಪೋಷಕರ ಕರ್ತವ್ಯ.

ಪರೀಕ್ಷೆ ಇಲ್ಲ, ಓದೂ ಇಲ್ಲ ಎಂಬ ತಾತ್ಸಾರದಲ್ಲಿ ಜಡತೆ, ನಿಷ್ಕ್ರಿಯತೆ, ಮುಂದೂಡುವ ಪ್ರವೃತ್ತಿ ಮೈಗೂಡುತ್ತವೆ. ಸದಾ ಚಂಚಲಗೊಳ್ಳುವ ಮನಸ್ಸು ಅನಾಹುತಗಳ ಸೃಷ್ಟಿಸುವುದ ಖಚಿತ. ಏಕಾಗ್ರತೆ ಕ್ಷೀಣಿಸಿ, ಅನಿಯಂತ್ರಿತ ಭಾವಾವೇಶದಲ್ಲಿ ನೈತಿಕ ಮೌಲ್ಯಗಳ ಕೊರತೆ ಎದ್ದು ಕಾಣತ್ತಿದೆ.  ಮನೆಯಲ್ಲೇ ಉಳಿದ ಮಕ್ಕಳು ಓದಿನಿಂದ ವಿಮುಖಗೊಳ್ಳುತ್ತಿದ್ದಾರೆ. ಈ ನಿಟ್ಟಿನಲ್ಲಿ ಜ್ಞಾನ ಸಂಪಾದನೆಯ ಅನಿವಾರ್ಯತೆಯಲ್ಲಿ ಪ್ರತ್ಯಕ್ಷ ಶಿಕ್ಷಣದಿಂದ(formal education) ವಂಚಿತ ಮಕ್ಕಳಿಗೆ ಸ್ವ ಅಧ್ಯಯನ ಭವಿಷ್ಯ ರೂಪಿಸಬಲ್ಲುದು.

1 ರಿಂದ 10 ನೆ ತರಗತಿ ಮಕ್ಕಳಿಗೆ ಪಠ್ಯಪುಸ್ತಕಗಳಿವೆ. ಬೋಧಿಸದ ಪಠ್ಯವನ್ನು ‘ಪಾಠ ಮಾಡಿಲ್ಲ’ ಅದು ಅಪರಚಿತ ಎಂಬ ಭ್ರಮೆ ಬಿಡಬೇಕು. ಪಠ್ಯ ಪುಸ್ತಕಗಳನ್ನು ಓದುವ ಹವ್ಯಾಸ ಬೆಳೆಸಿಕೊಳ್ಳಬೇಕು. ಶಿಕ್ಷಕರು ಅನಕ್ಷರಸ್ಥ ಪೋಷಕರೊಂದಿಗೆ ಸಂವಾದ ಸೃಷ್ಟಿಸುವ ಮೂಲಕ ಮಕ್ಕಳಗೆ ಪಠ್ಯಪುಸ್ತಕ ಅಭ್ಯಾಸಿಸುವ ಗೀಳು ಹಚ್ಚಬೇಕು. ಇದೆಲ್ಲಾ ಸಾಧ್ಯವಾ…ಎಂಬ ಹತಾಶೆ ಸಲ್ಲದು. ಪಠ್ಯ ಪುಸ್ತಕ ಸ್ಪರ್ಶಿಸುವ ಓದು ಮನೋಕೋಶದಲ್ಲಿ ಚಿರಸ್ಥಾಯಿ. ಅಧ್ಯಾಯಗಳ ಅಡಿಪಾಯ ಹೆಕ್ಕುವ ಮೂಲಕ ಸ್ವಯಂ ಕಲಿಕೆಗೆ ನಾಂದಿ ಹಾಡಬಹುದು.

1. ರಿಂದ 5 ನೇ ತರಗತಿ ಮಕ್ಕಳು ಶಾಲೆಯಿಂದ ದೂರ ಉಳಿದು ಕಲಿತದ್ದನ್ನು ಮರೆತಿದ್ದಾರೆ. ಸ್ವಯಂ ಪಠ್ಯ ಓದಿಗೆ ಕೆಲ ಸಲಹೆಗಳನ್ನು ಪಾಲಿಸಿ.ಅಧ್ಯಾಯಗಳನ್ನು ಓದುವ ಉದ್ದೇಶ ಸ್ಪಷ್ಟತೆ ಇರಲಿ. ರಚನಾತ್ಮಕತೆ ಪ್ರೇರಿಪಿಸುವ ಪ್ರಶ್ನೆಗಳು, ಕಿರು ಉತ್ತರ ಪ್ರಶ್ನೆಗಳು ಹಾಗೂ ದೀರ್ಘ ಉತ್ತರ ಪ್ರಶ್ನೆಗಳನ್ನು ವಿಂಗಡಿಸಿ ಉತ್ತರಿಸುವ ತಾದಾತ್ಮ್ಯ ಇರಲಿ. ಪಠ್ಯದ ಓದಿನ ಛಾಪು ಮೂಡಿಸಲು ಗಟ್ಟಿ ಧ್ವನಿಯಲ್ಲಿ ಓದಿ. ಆನಂತರ ಸಾಧ್ಯಾವಾದರೆ ಸಮೀಪದ ಪದವೀಧರರಲ್ಲಿ ಚರ್ಚೆ ನಡೆಸಿ.

2. ಸುದೀರ್ಘ ಅಧ್ಯಾಯದಲ್ಲಿನ ಸಾರವನ್ನು ಮನನ ಮಾಡಿಕೊಳ್ಳಿ. ಶಿರೋನಾಮೆ, ಉಪ ಶಿರೋನಾಮೆಗಳನ್ನು ಗ್ರಹಿಸಿ. ಪಠ್ಯ ಪುಸ್ತಕಗಳೊಂದಿಗೆ ನಿಮ್ಮ ಜೊತೆಗಾರನಂತೆ ಸ್ವೀಕರಿಸಿ. ಈ ಅಂಶಗಳತ್ತ ಪೋಷಕರ ಗಮನ ಹರಿಸಬೇಕು. ತಮ್ಮ ಮಕ್ಕಳಲ್ಲಿ ಧನಾತ್ಮಕ ಬದಲಾವಣೆಗೆ ಪ್ರೇರಕರಾಗಬೇಕು.

3.ದೈಹಿಕ ಶಕ್ತಿ ಗರಿಷ್ಟತೆ ಸಮಯ ಮುಂಜಾವಿನಲ್ಲಿ ಪಠ್ಯ ಓದಲು ರೂಢಿಸಿಕೊಳ್ಳಿಬೇಕು. 10 ರಿಂದ 15 ನಿಮಿಷಗಳ ಸಮಯವನ್ನು ಚಿಕ್ಕ ವಿಭಾಗ ಮಾಡಿಕೊಂಡ ಓದಿ. ಓದಿದ್ದನ್ನು ಚಿತ್ರಗಳ ರೂಪಕದಲ್ಲಿ ಮನನ ಮಾಡಿ. ಇದರಿಂದ ಜ್ಞಾಪಕ ಶಕ್ತಿ ಶಾಶ್ವತವಾಗಿ ಉಳಿಯಲಿದೆ.

4.ಕಲಿಕೆ ಸೃಜನಾತ್ಮಕತೆಗೆ ದಾರಿ, ಸೃಜನಾತ್ಮಕತೆ ಚಿಂತನೆಗೆ ಮಾರ್ಗಸೂಚಿ. ಚಿಂತನೆಯಿಂದ ಜ್ಞಾನ ವೃದ್ಧಿ. ಜ್ಞಾನದಿಂದ ಮಹಾನ್ ವ್ಯಕ್ತಿಗಳಾಗಲು ಸಾಧ್ಯ

5. ಗುರಿ, ನಿರಂತರ ಜ್ಞಾನ ಸಾಧನೆ, ಕಠಿಣ ಪರಿಶ್ರಮ, ಗ್ರಹಿಕೆ ಮಂತ್ರಗಳನ್ನು ಪಠಿಸುವ ಮೂಲಕ ಸ್ವಾವಲಂಬನೆ ಪಡೆಯಬೇಕು. ಪಠ್ಯದ ಅಭ್ಯಾಸ ಪ್ರತಿಗಳಲ್ಲಿ ಅಧ್ಯಾಯದ ಪ್ರಶ್ನೆಗಳಿಗೆ ಉತ್ತರ ದಾಖಲಿಸಬೇಕು. ನಿರಂತರ ಓದಿದ್ದನ್ನು ಬರೆಯುವ ಮೂಲಕ ಕಲಿಕೆ ಸ್ಥಿರಗೊಳಿಸಬೇಕು. ಸಂಬಂಧಪಟ್ಟ ಅಧ್ಯಾಯಗಳ ಚಿತ್ರಸಹಿತ ವಿವರಣೆಗೆ ಸಾಮಾಜಿಕ ಜಾಲತಾಣಗಳನ್ನು ಸದುಪಯೋಗ ಪಡಿಸಿಕೊಳ್ಳಬೇಕು. ಸ್ವಯಂ ಕಲಿಕೆಯಲ್ಲಿ ಸಂತೃಪ್ತಿ ಸಿಗಲಿದೆ.