ಒಳಗೆ ಕಾಲಿಡುತ್ತಿದ್ದಂತೆ ಗೋಡೆ ಶೋಕೇಸು ಟೇಬಲ್ಲಿನ ಗಾಜುಪೀಸಿನ ಅಡಿಯಲ್ಲಿ ಹೀಗೆ ಎಲ್ಲಂದರಲ್ಲಿ ಕಣ್ಣಿಗೆ ರಾಚಿಸುವ ಬಣ್ಣ ಬಣ್ಣದ ತರಹೇವಾರಿ ಗಾತ್ರದ ಚಿತ್ರಪಟಗಳು .
ವಿವಿಧ ಸ್ಥಳಗಳಲ್ಲಿ , ಸುಪ್ರಸಿದ್ಧ ನಟ ನಟಿಯರೊಂದಿಗೆ , ರಾಜಕೀಯ ಧುರೀಣರೊಂದಿಗೆ , ಕ್ರೀಡಾ ಕ್ಷೇತ್ರದ ದಿಗ್ಗಜರೊಂದಿಗೆ ಎಲ್ಲಾ ರಂಗದ ಸಿಲೆಬ್ರೆಟಿಗಳೊಂದಿಗೆ ಒಬ್ಬಾತ ಆ ಪಟಗಳಲ್ಲಿ ಕಾಣಸಿಗುತ್ತಿದ್ದ . ಆ ವ್ಯಕ್ತಿಯೇ ಆ ಸ್ಟುಡಿಯೋದ ಮಾಲೀಕ ಮತ್ತು ಅದೇ ಕೌತುಕದ ಫೋಟೋ ಸ್ಟುಡಿಯೋ .
ಹಿಂದೆಲ್ಲಾ ಪ್ರತೀ ಸ್ಟುಡಿಯೋದ ವಿನ್ಯಾಸ ಒಂದೇ ರೀತಿಯಾಗಿದ್ದರೂ ಅದರಲ್ಲಿರುವ ಎರಡು ಕೋಣೆಗಳಲ್ಲಿ ಒಂದು ಡಾರ್ಕ್ ರೂಂ ಎಂದು ಕುತೂಹಲಕಾರಿಯಾಗಿಯೂ ಮತ್ತೊಂದು ಫೋಟೋ ತೆಗೆಸಿಕೊಳ್ಳುವ ರೂಮು ಎಂದು ಆತ್ಯಾಕರ್ಷಕವಾಗಿಯೂ ಇರೋದು. ಒಂದು ನಿಲುವುಗನ್ನಡಿ ಅದರ ಮುಂದೆ ಬಾಚಣಿಗೆ ಜೊತೆಗೊಂದು ಪೌಡರಿನ ಡಬ್ಬ . ಗೋಡೆಗೆ ಇಳಿಬಿಟ್ಟ ಉದ್ದನೆಯ ಕಪ್ಪು ಬಿಳಿ ಮತ್ತು ಆಕಾಶ ನೀಲಿ ರಂಗಿನ ಪರದೆಗಳು .ಒಂದು ಮರದ ಸ್ಟೂಲು ಅದರ ಎದುರಿಗೇ ಸ್ಟ್ಯಾಂಡಿನಲ್ಲಿ ರಾಜನಂತೆ ಕಂಗೊಳಿಸುತ್ತಿದ್ದ ಕಡುಗಪ್ಪು ಕ್ಯಾಮರಾ .
ನಾವುಗಳು ನಮ್ಮೂರಿನ ಸ್ಟುಡಿಯೋಗೆ ಕಾಲಿಡಲು ಪ್ರಮುಖ ಕಾರಣ ಅಂದ್ರೆ ಅದು ಪಾಸ್ಪೋರ್ಟ್ ಸೈಝಿನ ಭಾವಚಿತ್ರ .
ಶಾಲೆಯ ಪ್ರವೇಶಕ್ಕೆ , ಹೈಸ್ಕೂಲು ಕಾಲೇಜಿನ ಗುರುತಿನ ಚೀಟಿಗೆ . ಲೈಬ್ರೆರಿ ಕಾರ್ಡಿಗೆ , ಬಸ್ ಪಾಸಿಗೆ . ಎಂಪ್ಲಾಯ್ಮೆಂಟ್ ಕಾರ್ಡಿಗೆ . ಹೀಗೆ ಪಾಸ್ಪೋರ್ಟ್ ಸೈಝಿನ ಫೋಟೋ ನಮಗೆ ಅತೀ ಜರೂರಿನದ್ದಾಗಿತ್ತು . ಫೋಟೋ ತೆಗೆದು ಮಾರನೆಯ ದಿನ ತೊಳೆದು ಒಣಗಾಕಿ ಅದನ್ನು ಸರಿಯಾದ ಅಳತೆಗೆ ಕತ್ತರಿಸಿ ಕವರಿನಲ್ಲಿ ಹಾಕಿ ಮೂರು ಫೋಟೋಗಳ ಜೊತೆ ಒಂದು ಸಣ್ಣ ಎಕ್ಸ್ ರೇ ಪ್ರತಿಯಂತೆ ಕಾಣುವ ಕಂದು ಬಣ್ಣದ ನೆಗೆಟಿವ್ ಕೊಡುತ್ತಿದ್ದರು .ನಾವು ಆ ನೆಗೆಟೀವನ್ನು ಜೋಪಾನ ಮಾಡಿ ಅದರಲ್ಲಿ ನಮಗೆ ಬೇಕೆಂದಾಗ ಪ್ರಿಂಟ್ ಹಾಕಿಸಿಕೊಳ್ಳುತ್ತಿದ್ದೆವು .
ಹಿಂದೆಲ್ಲಾ ನೆಂಟರ ಮನೆಗೋ ಸ್ನೇಹಿತರ ಮನೆಗೋ ಒಟ್ನಲ್ಲಿ ಯಾರದೇ ಮನೆಗೆ ಹೋದ್ರು ಅವರ ಮನೆಯ ಗೋಡೆಯ ಮೇಲೆ ಆ ಮನೆಯ ಯಜಮಾನರ ಫೋಟೋ ಮಕ್ಕಳ ಬಾಲ್ಯದ ಫೋಟೋ . ಡ್ರೈವರ್ ಆಗಿದ್ರೆ ಕಾರಿನ ಜೊತೆ . ಕಾರ್ಮಿಕನೋ ಸೈನಿಕನೋ ಪೋಲೀಸೋ ಆಗಿದ್ರೆ ಸಮವಸ್ತ್ರದಲ್ಲಿ ಇರುವ ಫೋಟೋಗಳು , ಇದರ ಜೊತೆಗೆ ಒಂದಷ್ಟು ಫೋಟೋಗಳು ಆಲ್ಬಮ್ಗಳಲ್ಲಿ ಕಾಣಸಿಗುತ್ತಿತ್ತು .
ಒಂದೊಂದು ಫೋಟೋ ಹಿಂದೆಯೂ ಅದರದ್ದೇ ಆದ ಕತೆಯಿರುತ್ತಿತ್ತು . ಆ ಫೋಟೋ ಎಲ್ಲಿ ತೆಗೆದೆದ್ದು ಅದನ್ನು ತೆಗೆದ ಫೋಟೋಗ್ರಾಫರ್ ಯಾರು ಎಲ್ಲವನ್ನೂ ಆ ಮನೆಯವರು ಹಂಚಿಕೊಳ್ಳುತ್ತಿದ್ದರು .
ಪ್ರತೀ ಕುಟುಂಬಕ್ಕೊಬ್ಬ ಫೋಟೋಗ್ರಾಫರ್ ಆಪ್ತನಾಗಿರುತ್ತಿದ್ದ . ಮನೆಯಲ್ಲಿ ಯಾವುದೇ ಕಾರ್ಯಕ್ರಮವಿರಲಿ ಮುಂಚೇನೇ ಅವರನ್ನು ಕರೆಸಿ ತಿಂಡಿ ಕಾಫಿ ಮಾಡಿಸಿ. ಒಂದಷ್ಟು ಮುಂಗಡ ಹಣ ನೀಡಿ ಚೆನ್ನಾಗಿ ತೆಗೀಬೇಕಪ್ಪ ಅಂತ ಕಾರ್ಯಕ್ರಮಕ್ಕೆ ಬುಕ್ ಮಾಡಿಕೊಂಡು ಕಳಿಸುತ್ತಿದ್ದರು .
ಇಂದು ಮೊಬೈಲ್ ಕ್ರಾಂತಿಯಿಂದ ಫೋಟೋ ಸ್ಟುಡಿಯೋಗಳು ಮುಚ್ಚುವ ಹಂತ ತಲುಪಿದ್ದು ಲಕ್ಷಾಂತರ ಫೋಟೋಗ್ರಾಫರ್ಗಳ ಬದುಕು ಅತಂತ್ರವಾಗಿದೆ.ಕ್ಯಾಮರಾ ಕೈಯಲ್ಲಿ ಹಿಡಿದು ಸ್ಮೈಲ್ ಪ್ಲೀಸ್ ಅನ್ನುತ್ತಿದ್ದ ಕ್ಯಾಮರಾಮ್ಯಾನ್ ತನ್ನ ಸ್ಮೈಲನ್ನೇ ಕಳೆದುಕೊಂಡಿದ್ದಾನೆ .
Photo by Alexander Dummer from Pexels