ಶನಿವಾರದ ಸೋಲನ್ನು ಸವಾಲಾಗಿ ಸ್ವೀಕರಿಸಿ ಭಾವನೆಗಳ ಹೊಯ್ದಾಟವನ್ನು ಬದಿಗಿಟ್ಟು ದೃಢ ಮನಸ್ಸಿನಿಂದ ಸೆಣಸಿದ ಹೈದರಾಬಾದಿನ ಪಿ ವಿ ಸಿಂಧೂ ಟೋಕಿಯೋ ಒಲಂಪಿಕ್ಸ್ ನ ಮಹಿಳಾ ಬ್ಯಾಡ್ಮಿಂಟನ್ ಸಿಂಗಲ್ಸ್ ನಲ್ಲಿ ಭಾನುವಾರ ಭಾರತಕ್ಕೆ ಕಂಚಿನ ಪದಕವನ್ನು ಸಂಪಾದಿಸಿ ಕೊಡುವಲ್ಲಿ ಸಫಲರಾದರು.
ರಿಯೋ ಒಲಂಪಿಕ್ಸ್ ನಲ್ಲಿ ಬೆಳ್ಳಿ ಪದಕ ಪಡೆದಿದ್ದ ಸಿಂಧೂ ಮೇಲೆ ಇದ್ದ ಭರವಸೆ ಆಕೆ ತೀವ್ರ ಒತ್ತಡಕ್ಕೆ ಸಿಲುಕುವಂತೆ ಮಾಡಿತ್ತು. ಶನಿವಾರ ಪಂದ್ಯ ಸೋತಾಗ ನಿರಾಸೆಯ ಕಾರ್ಮೋಡ ಆವರಿಸಿದ್ದರೂ ಸಿಂಧೂ ಭರವಸೆಯನ್ನು ಹುಸಿ ಮಾಡಲಿಲ್ಲ. ನಿರಾಸೆಯನ್ನು ಬದಿಗೊತ್ತಿ ಚೀನಾದ ಹೆ ಬಿಂಜಿಯೋ ಅವರನ್ನು ನೇರ ಪಂದ್ಯದಲ್ಲಿ ಸೋಲಿಸಿ ಕಂಚಿನ ಪದಕ ಪಡೆದರು.
ರಿಯೋ ಒಲಿಂಪಿಕ್ಸ್ ನಲ್ಲಿ ಬೆಳ್ಳಿ ಪದಕ ಪಡೆದದಕ್ಕಿಂತ ಹೆಚ್ಚಿನ ಸಂತೋಷ ಈಗ ಆಯಿತು ಎಂದು ಸಿಂಧೂ ಹೇಳಿದ್ದಾರೆ. ಈ ಪದಕ ಪಡೆಯುವ ಮೂಲಕ ಒಲಂಪಿಕ್ಸ್ ನ ಮಹಿಳಾ ಬ್ಯಾಡ್ಮಿಂಟನ್ ಸಿಂಗಲ್ಸ್ ನಲ್ಲಿ ಎರಡು ಪದಕ ಗೆದ್ದ ನಾಲ್ಕನೇ ಮಹಿಳಾ ಆಟಗಾರ್ತಿ ಎಂಬ ಗೌರವಕ್ಕೂ ಪಾತ್ರರಾದರು.
ಪ್ರಧಾನಿ ನರೇಂದ್ರ ಮೋದಿ ಸೇರಿದಂತೆ ಆನೇಕ ಗಣ್ಯರು ಸಿಂಧೂಗೆ ಅಭಿನಂದನೆ ತಿಳಿಸಿದ್ದಾರೆ.